Токторов: Малаховдун берүүсүндө Кыргызстанды уят кылып албайын деп кармандым
© Sputnik / Асель Сыдыкова
Жазылуу
Кыргыз Республикасынын эмгек сиңирген артисти Бактияр Токторов Андрей Малахов алып барган берүүгө чакырылышы өзү үчүн күтүүсүз болгонун айтты.
Токторов: Малаховдун берүүсүндө Кыргызстанды уят кылып албайын деп кармандым
Малаховдун программасынан жай мезгилинде эле байланышка чыгышкан. Алгач мага жөн эле кыздар тийишип жатат го деп ойлоп, ишенген эмесмин. Бул тууралуу Бактияр Токторов Sputnik Кыргызстан радиосуна маек куруп жатып билдирди.
"Россия-1" телеканалынан байланышка чыгып, алгач "Буй-буй" ырымдын таржымалын, өзүм тууралуу сурашты. Андан соң Кыргызстанга келип өзүм, үй-бүлөм тууралуу кыскача тартып кетерин айтышты. Мен биринчи ишенген эмесмин. Учурда айрым кыргызстандыктар "Баткенде каргашалуу окуя болуп жатса, ырдап жүрөт" деп сын айтып жатышпайбы. Программа ошол күндөргө удаа эле эфирге чыкканы менен тартылганына бир айдан көп убакыт болгон. "Россия-1" телеканалынын Андрей Малахов алып барган "Песни от всей души" берүүсүнүн жамааты абдан оперативдүү иштешет экен. Баарыбызды заматта чогултуп эле программаны тартып алып, узатып коюшту. Малаховдун өзү менен же башка катышуучулар менен кенен баарлашканга убакыт болгон жок. Бул жактан баратканда сүрдөйм го деп ойлогом, бирок өзүмдү эркин сезип жүрдүм. "Буй-буйдун" фонограммасын сурашканда жандуу үн менен ырдаарымды айттым. Ошол күнү бир аз тамагым ооруп турганына карабай жандуу ырдадым. Өлкөнүн атынан барып жаткан соң Кыргызстанды уят кылып албайын деп бир аз кармандым. Болбосо өзүмө гана таандык импровизацияларды аткаргым келди. Программа абдан жагымдуу маанайда тартылды. Катышуучулардын бардыгы менен эски тааныштай эле сүйлөшүп жаттык. Бул дагы бир жолу музыкада тилдин кереги жок дегенди далилдейт", — деди Токторов.
Ал 15 жыл мурда жаралган "Буй-буй" ырынын азыркы күнгө чейин эл оозунан түшпөй келишин кудайдын белеги деп түшүнөрүн кошумчалады.
