"Манас ааламы" үчүн сулууларды издеген Мелис Убукеев. Таберик сүрөт

Жазылуу
Sputnik Кыргызстан маалымат агенттиги архивде сакталган сейрек сүрөттөрдү жарыялап, анын тарыхын баяндоону улантат.
Sputnik/ Александр Федоров
Белгилүү актриса Гүлнара Чокубаева менен жанындагы сулуунун сүрөтү 1995-жылы Ысык-Көл облусунун Ак-Суу районунда тартылган.
Ал жылы кыргыз киносунун түптөөчүлөрүнүн бири, режиссёр, тарыхчы Мелис Убукеев "Манастын ааламы" көркөм-публицистикалык тасмасын тартуу иштерин баштаган. Кинокартинада актриса Манастын аялы Каныкейдин ролун аткарган.
Ошол кезеңди Гүлнара Чокубаева мындайча эскерет.
"Мени ал тасмага Мелис Убукеев "Кыргызфильмде" иштеп жүргөндө чакырган. Анда мен 34 жашта болчумун. Сүрөттө жанымда турган кыз актриса эмес, борбор калаадагы жогорку окуу жайлардын биринде окуган чырайлуу студент болчу. Режиссер андай сулуу кыздарды чогултуп массовкага катыштырган. Мен кинофильмде Манастын аялы Каныкейдин ролун аткаргам. Сүрөттөгү эпизод Манас каза болгондон кийин кара кийип аза күтүп отурган учурум. Анда тагынган зер буюмдарды биздин студия атайын изилдеп жасаткан. Мелис аганын биринчи жогорку билими тарых адистиги болгондуктан кыргыз элинин тарыхын, үрп-адатын, каада-салтын мыкты билчү, "Манас" эпосунун майда-баратына чейин өтө кызыктуу айтып берчү. Биз аны баяндаганын угуп, оозубузду ачып эле отуруп калчубуз", — деди Чокубаева.
Эске сала кетсек, режиссер Мелис Убукеев эмгек жолунда "Манас" эпосуна көп кайрылган. Анын атасы Айткулу Убукеев манасчы Саякбай Каралаев менен жакшы мамиледе болгондуктан кино тармагына аралашкан кезинде эле эпосту толук кандуу көркөм тасма кылууга бел байлаган. 1966-жылы үч бөлүктөн турган "Саякбай", кийин жети бөлүктөн турган "Улуу манасчы", "Миң жылдыктын прологу" даректүү тасмаларын камерага түшүргөн.
Тема боюнча:
Асанкан Жумакматов менен Кайыргүл Сартбаеванын күлгүн курагы. Таберик сүрөт
Курал көтөргөн Чокморов, "Оскар" алган кинокартина. Таберик сүрөт
Жаңылыктар түрмөгү
0