БИШКЕК, 24-авг. — Sputnik. "Түндүк электр" ишканасы 26-августтан тарта Бишкек шаарындагы беш миң абоненттин электр жарыгын өчүргөнү жатат. Бул тууралуу мекеменин маалымат кызматы билдирди.
Көрсөтүлгөн күнгө чейин электр энергиясына болгон карыздан кутулуу боюнча компаниядан эскертүү болгон. Эми убагында төлөбөй койгондордун жарыгы өчүрүлөт. Абоненттердин жалпы карызы канча экени маалыматта айтылган эмес.
Эскерте кетсек, "Түндүк электр" ишканасы Бишкек шаарын, Чүй жана Талас облустарын электр энергиясы менен камсыздайт.
Мекемеден билдиришкендей, карызды Quickpay, Pay24, UMAI, KICB, "БТА Банк", ошондой эле UMAI, "Элсом" электрондук капчыктары, "Айыл Банкы", "Дос Кредо Банкы", "БТА Банкы", "КЫРГЫЗСТАН коммерциялык банкы" терминалдарынан, ошондой эле "Кыргызпочтасы" мамлекеттик ишканасы аркылуу төлөөгө болот.
Ысык-Көл менен Нарында жарык өчүрүлөт. Элдин карызы 100 млн сомго чукулдады
"Акылдуу эсептегичтер" жарыкты аралыктан өчүрөт. Карыз төлөнгөндөн кийин абонент кайра электр энергиясына ошол эле жол менен туташтырылат.
"Түндүк электр" буга чейин карызы төлөнбөгөн Бишкектин он миңдей абонентинин свети өчүрүлөрүн айткан.
Мекемеден билдиришкендей, өкмөттүн 26-мартындагы көрсөтмөсү менен дебитордук карызы барлардын жарыгын өчүрүү иштери үч айга чейин токтотулган болчу.
Учурда "Түндүк электр" кадимки режимде иштөөгө өткөн.
