БИШКЕК, 26-июл. — Sputnik. Түндүк Кореяда COVID-19 инфекциясына шектелген алгачкы адам аныкталып, өлкөнүн лидери Ким Чен Ын Кэсон шаарын карантинге жапты. Бул туурасында РИА Новости билдирди.
Түндүк Кореянын борбордук агенттигинин маалыматы боюнча, коронавируска шектелген жаран 19-июлда Түштүк жана Түндүк Кореянын аскердик-демаркациялык чек арасынан мыйзамсыз түрдө өтүп келген. Андан анализ алышканда жыйынтыгы арсар көрсөтүлгөн. Мындан улам ал катаал карантинге алынып, бийлик аны менен байланышта болгон адамдарды аныктап жатат.
Ким Чен Ын ал жайгашкан Кэсон шаарын толугу менен жаап, башка аймактар менен катышына чек койгон. Ошондой эле өзгөчө кырдаал режимин киргизген.
ДССУ коронавируска каршы вакцина элге массалык түрдө качан жетерин айтты
Өлкө лидеринин жетекчилиги астында Борбордук комитеттин Эмгек партиясынын саясий бюросу кырдаалды карап чыгуу үчүн чукул жыйын өткөргөн. Анда “улуттук чукул карантиндик системадан” “жогорку чукул системага” өтүү чечими кабыл алынган.
Эгер Түштүк Кореядан кайтып келген адамдан оору аныкталса, Түндүк Кореяда коронавирус жуктурган алгачкы учур болуп калмакчы.
