БИШКЕК, 9-июл. — Sputnik. Ысыкта ичимдик ичүү өтө зыян. Анын кооптуу жактары тууралуу Sputnik радиосуна психиатр-нарколог Алексей Казанцев айтып бергендигин РИА Новости жазды.
Адистин айтымында, ысыкта алкоголдук ичимдик ичүү, болгондо да өтө ашыкча ичип алуу ден соолукту бир топ жабыркатат. Анын үстүнө азыраак көлөмгө эле адам мас болуп калат.
"Сидр менен сыра аз газдалган жеңил алкоголдук ичимдиктерге кирет. Булар ашказанга бат сиңип, андан адам эрте эле мас болуп калат. Ал эми шекер кошулган вино жана ар кандай алкоголдук коктейлдер организмден көпкө чейин тарабайт", — деди Казанцев.
Мындан тышкары, ичип алган адам кырсыктап же бир жерин кокустатып алуусу толук мүмкүн.
Ден соолукка зыяны көп спирт ичимдиги аталды
Эгер ысыкта алкоголдон баш тарта албасаңыз, анда газы жок, жеңил алкоголдук суусундуктарды тандаңыз.
"Ага муз же муздак суу аралаштыруу керек. Ал үчүн күн чакчайып тийген жерде эмес, үстү жабык жайда жана кечкурун отурган оң", — деди Казанцев.
Ал эми эң башкысы, ысык болобу, суук болобу, ичкиликти ченеми менен ичкенди билүү керек.
