БИШКЕК, 3-июл. — Sputnik. Белгилүү дарыгер Сабырбек Жумабеков жеке баракчасы аркылуу Кыргызстандын олигархтарына кайрылып, жардам сурады.
Анын айтымында, учурда эуфиллин, дексаметазон, адреналин, гепарин, фраксипарин, кальций глюконат, анальгин, димедрол, диклофенак, кетонал сыяктуу дарылар жетишсиз болууда.
"Урматтуу бизнесмендер, олигархтар, өлкөдө көзгө көрүнбөгөн душман менен күрөш жүрүп жатат. Бир күндө болжол менен дарылоого муктаж миңдей бейтап кайрылууда. Өкмөт менен Саламаттык сактоо министрлиги "Ганси" базасында 1000ден ашуун орун даярдады. Министрлик дары-дармекти тийиштүү көлөмдө алууга жетишпей жатат. Мындан улам биз, медиктер, сиздерден жардам сурайбыз. Дары-дармек, оксигенератор сыяктуу медициналык жабдуу керек (оксигенератор — катетердин жардамы менен бейтапка кычкылтек берилчү аппарат — ред.). Эуфилин, дексаметазон, адреналин, гепарин, фраксипарин, кальций глюконат, анальгин, димедрол, диклофенак, кетонал, шприцтер жетишсиз. Кан куюучу система, спирттелген кол аарчылар, коргоочу костюмдар, көз айнек зарыл болуп турат", — деп жазган Жумабеков.
Дарыгер жардам боюнча жооптуу куратор деп Чыңгыз Нарынбаевди көрсөтүп, телефон номерин (0 706 203 021) кошо жарыялаган.
Коронавирус боюнча кырдаал
Республика боюнча COVID илештирип алгандардын жалпы саны 6 767ге жетти. Анын 2 655и айыгып, 76 киши көз жумду. Акыркы маалымат боюнча, 638 бейтап стационарда дарыланып жатса, анын 19у реанимацияда. Ал эми үй карантининде 3 398 киши дарыланууда.
Жумабеков: пневмонияны дарылоого "Гансиде" 200 орун даярдадык
Коронавирустун кесепетинен келип чыккан пневмония оорусунан март айынан бери 120 адам каза тапты. Учурда бул илдетке кабылган 1 724 бейтап ооруканада жатат. Анын ичинен 337 адамдын абалы оор, 112 киши реанимацияда.
Өлкө аймагындагы соңку кабарлар менен биздин Telegram-каналдан таанышып туруңуз.
