БИШКЕК, 13-май — Sputnik. Саламаттык сактоо министрлиги ПЦР-тест сатып алуусун жана гуманитардык жардам катары издөөсүн улантат. Бул тууралуу саламаттык сактоо министринин орун басары Нурболот Үсөнбаев брифинг учурунда айтты.
"Алгачкы ПЦР-тесттерди Россиядан алганбыз. Дал ошол тесттер өлкөдөгү эң биринчи учурларды каттоого жардам берди. Кийин Түркиядан келген, бирок алар колдонулуп бүттү. Кийин өзүбүз Белоруссия жана Түркиядан сатып алганбыз. Ушул тапта Белоруссиядан дагы 150 миң ПЦР-тест сатып алууну пландап жатабыз", — деди Үсөнбаев.
Ал ПЦР-иликтөө коронавирус менен күрөшүүдө өтө маанилүү элемент экенин кошумчалады.
Эске салсак, өткөн жумада Кытай өкмөтү чартердик каттам менен 100 миң даана ПЦР-тестти гуманитардык жардам катары жөнөткөн.
Коронавирустун кесепети
Кыргызстанда коронавируска кабылгандардын саны 1044кө жетти. Анын ичинен 726сы айыкса, 12 адам көз жумган.
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
