БИШКЕК, 28-апр. — Sputnik. Түзүлгөн кырдаалга байланыштуу Улуу Ата Мекендик согуштагы Жеңиштин 75 жылдыгына карата массалык иш-чаралар өткөрүлбөйт. Бул тууралуу президенттин маалымат кызматы билдирди.
Аталган маселе бүгүн, 28-апрелде, чакан курамдагы Коопсуздук кеңешинин жыйынында каралган.
“Акыркы жылдары элдин кеңири колдоосуна ээ болгон массалык акция — “Өлбөс полк” иш-чарасын онлайн форматта өткөрүү сунушталып жатат”, — деди президент Сооронбай Жээнбеков.
Ошону менен бирге өлкө башчысы согуштун ардагерлерине жана тылдын катышуучуларына адаттагыдай эле өзгөчө көңүл бөлүнөрүн, жалпыга маалымдоо каражаттарында Улуу Жеңишке арналган долбоорлор кеңири чагылдырыларын белгилеген.
Эскерте кетсек, коронавирус пандемиясына байланыштуу Бишкек, Ош, Жалал-Абад шаарлары жана Ат-Башы районунда 10-майга чейин өзгөчө абал режими узартылып жатат. Массалык иш-чараларды өткөрүүгө өлкө боюнча тыюу салынган.
