БИШКЕК, 13-апр. — Sputnik. Баткен жана Ош облустарындагы дарыгерлерге жардам берүү үчүн Бишкектен медиктердин дагы бир бригадасы жөнөп кетти. Бул туурасында Саламаттык сактоо министрлиги билдирди.
Маалыматка ылайык, бүгүн, 13-апрелде, өлкөдөгү коронавирустун очогу болгон аймакка өз ыктыяры менен баруу ниетин билдирген медицина кызматкерлеринен турган топ жолго чыкты. Курамында эпидемиолог, анестезиолог-реаниматологдор жана жугуштуу оорулар менен күрөшкөн адистер бар. Алар аймактарда бир ай бою кызмат кылышары айтылат. Ушуну менен борбор калаадан региондорго алтынчы бригада кетип жатат.
Белгилей кетсек, учурда Ош облусунда жана шаарында 187, Баткен облусунда беш адам коронавирус жуктурганы аныкталды.
Коронавирустун кесепети
Бишкек, Ош, Жалал-Абад шаарлары менен Сузак, Кара-Суу, Ноокат райондоруна 25-марттан 15-апрелге чейин өзгөчө абал киргизилди.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
