БИШКЕК, 1-апр. — Sputnik. Кыргызстанда бүгүн коронавирус жуктурганы аныкталган төрт адамдын бирөө Россиядан келген. Бул туурасында Саламаттык сактоо министрлигинин штаб жетекчисинин орун басары Касымбек Мамбетов маалымат жыйын учурунда билдирди.
Эске салсак, Кыргызстанда бүгүн дагы төрт адамдан коронавирус аныкталды.
"Жаӊы аныкталган учурлардын ичинен бирөө сырттан келген, тагыраагы, Россиядан. Үчөө оорулуулар менен байланышта болуп жуктуруп алышкан", — деди Мамбетов.
Коронавирус Кыргызстанда
Кыргызстанда коронавируска кабылган адамдардын саны 111ге (52си эркек, 59у аял) жетти. Анын ичинен Сузактын үч тургуну айыгып чыккан. Тилекке каршы, Ош облусунда COVID-19 жуктурган үч адамдын абалы оорлошуп, реанимацияда жатат.
Эске салсак, Бишкек, Ош, Жалал-Абад шаарларында жана Сузак, Ноокат, Кара-Суу райондорунда 15-апрелге дейре өзгөчө абал жарыяланган. Кечки саат 20.00дөн 7.00гө чейин коменданттык саат киргизилди.
Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.
