БИШКЕК, 30-мар. — Sputnik. Бүгүн Кыргызстанда коронавирус жуктуруп алган бейтаптардын айыккандары ооруканадан чыгарылат. Бул тууралуу саламаттык сактоо министри Космосбек Чолпонбаев түштүк аймакка дарыгерлерди узатып жаткан иш-чарада айтты. Бул иш-чара министрликтин Facebook баракчасында түз алып көрсөтүлгөн.
Анын айтымында, ооруканадан чыгарылчу бейтаптар Жалал-Абаддан. Толугураак маалымат бейтаптар үйлөрүнө чыгарылгандан кийин берилет.
Коронавирус Кыргызстанда
29-март күнү Кыргызстанда дагы 26 адамга COVID-19 инфекциясы жукканы аныкталды. Ушуну менен өлкөдө коронавируска кабылгандардын саны 84кө жетти. Алардын басымдуу бөлүгү Ош жана Жалал-Абад облустарында.
Бишкек, Ош, Жалал-Абад шаарлары менен Сузак, Кара-Суу, Ноокат райондоруна өзгөчө абал киргизилип, кечки саат 20:00дөн кийин көчөгө чыгууга тыюу салынган. Мындай режим 15-апрелге чейин уланат.
Ушу тапта өлкө ичинде абал кандай болуп жатканын Sputnik жүргүзгөн тексттик баяндамадан билүүгө болот.
