БИШКЕК, 30-мар. — Sputnik. Кытайда COVID-19 инфекциясын жуктуруп алгандардын 93 пайызы айыкты. Бул тууралуу РИА Новости кабарлады.
Маалыматка ылайык, Кытайдын ооруканаларында коронавирустун жаңы түрүн илештирип алгандардын ичинен 2396 гана адам калган.
Хубэй провинциясын кошпогондо, Кытайда коронавирус илештирип алган 13 669 учур катталган. Анын ичинен 118 адам каза болгон. Ал эми Хубэйде 67 801 учур катталып, 3186 адам көз жумган.
Кытай боюнча эпидемия 3304 адамдын өмүрүн алган. Баса, Кытай бийлиги коронавирус эпидемиясын токтоткондугун жар салган.
Коронавирус узаган жылдын декабрь айынын этегинде Кытайдын Хубэй провинциясындагы Ухань шаарында тараган. Андан бери 200гө чукул мамлекетке жайылып, жүз миңдеген кишиге жугуп, он миңдеген киши көз жумуп жатат. Ошондой эле айыккандар да арбын.
