БИШКЕК, 18-фев. — Sputnik. Борбор калаада кыргыз күрөшү боюнча өлкө чемпионаты өткөрүлөт. Мелдештин жыйынтыгы менен Көчмөндөр оюндарына катыша турчулар аныкталарын Жаштар иши, дене тарбия жана спорт агенттигинен билдиришти.
Мелдеш 1-2-март күндөрү борбордогу Кожомкул атындагы спорт сарайында өтмөкчү. Анда республиканын чар тарабынан келген балбандар жети салмак категорияда (55, 60, 66, 74, 84, 96 жана 96 килограмм) күч сынашат.
Эске салсак, дүйнөлүк көчмөндөр оюндары Кыргызстанда үч ирет өткөн. Соңку ирет 2018-жылдын 2-8-сентябрында Ысык-Көлдө үчүнчү жолу уюштурулуп, кийинкисин өткөрүү милдетин Түркия алган. Мелдеш Бурса аймагында өтөт, бирок убактысы так айтыла элек.
Көчмөндөрдүн дүйнөлүк IV оюндарына кыргыз улуттук спортунун жети түрү киргизилген. Алар — көк бөрү, эр эңиш, кыргыз күрөшү, ордо, тогуз коргоол, алыш бел боо күрөшү жана көчмөндөрдүн улуу күрөшү болмокчу.
