БИШКЕК, 1-дек. — Sputnik. Кыргызстанда автокөлүктөргө жасалма мамлекеттик номер таккандардын саны көбөйдү. Бул туурасында парламент жыйынында ИИМдин Жол кыймылы коопсуздугун камсыздоо башкы башкармалыгынын жетекчисинин орун басары Ыманалы Саркулов билдирди.
Анын айтымында, айдоочулар атайын каражаттардын же материалдардын жардамы менен мамлекеттик номерлерди жасатып алып, колдонушат. Аны камера аныктай албай калат.
"КРдин Эреже бузуулар кодексинин 121-беренесинин төртүнчү бөлүгүндө мамлекеттик жасалма номер таккан айдоочуга бешинчи категорияга чейин айып пул салынат. Ал 10 миң сомду түзөт", — деп белгилеген Саркулов.
Анткен менен жасалма номер менен жүргөндөр көбөйүп бара жаткандыктан ЖКККББ жоопкерчиликти күчөтүү максатында Эреже бузуулар кодексинин 121-беренесинин 4-бөлүгүн Жоруктар кодексинин 173-беренесине алмаштырууну сунуштады. Аталган беренеге ылайык, айып пул биринчи категорияга чейин каралышы ыктымал. Тагыраагы, чоңдор 20 миңден 30 миң сомго чейин төлөсө, жашы жете электер 5 миңден 10 миң сомго чейин төлөйт.
