БИШКЕК, 20-сен. — Sputnik. Жолду оңдоордон мурда ойлонуп, ыңгайсыздыктарды азайтып, көчөлөрдө убактылуу эки тараптуу кыймылды уюштуруу мүмкүндүгүн карап чыгуу абзел. Бул маселе боюнча премьер-министр Мухаммедкалый Абылгазиев тиешелүү жактарга тапшырма бергенин өкмөттүн маалымат кызматы кабарлады.
Абылгазиев вице-премьер Разаковго жолдорду оңдоо учурундагы ыңгайсыздыкты тез чечүүнү көзөмөлдөө милдетин такты.
"Абылгазиев Бишкек шаарынын мэриясына, ИИМ, Маалыматтык технологиялар жана байланыш мамлекеттик комитетине тапшырма берди. Алар эми биргеликте борбордук көчөлөрдү оңдоо учурунда жолдогу кыймылды оптималдаштыруу боюнча натыйжалуу чараларды тез арада көрүшү керек", — деп айтылат маалыматта.
"Премьер-министр жол агымы жыш болуп, автотыгын жаралган сааттарда убакытты үнөмдүү пайдалануу үчүн светофордук жөнгө салууну анализдегенге өзгөчө көңүл бурууну тапшырган", — деп айтылат маалыматта.
Жол темасына келсек, Sputnik Кыргызстан буга чейин Бишкектеги оңдолуп-түзөлүп, бир жылга жетпей бузула баштаган жаңы жолдор туурасында видео материал жасаган.
