Өзбекстан жана Тажикстандан Кыргызстанга иштегени келген жарандар «иштөөгө уруксат» деген кагазды алууга мүмкүнчүлүк жок болуп жатат. Бул тууралуу Майрамбек Бейшенов Sputnik Кыргызстан радиосунун таңкы эфиринде маек куруп жатып билдирди.
Анын айтымында, мындай маселе аймактарда Миграция кызматынын бөлүмдөрү жок экенинен улам жаралууда.
"Кыргызстандын мыйзамдары менен өкмөт аралык келишимдердин негизинде Өзбекстандын жана Тажикстандын жарандары Кыргызстанда 60 күндөй визасыз жүрүп, иштеп жатышат. 60 күндөн көп убакыт өлкө аймагында жүрсө, сөзсүз каттоодон өтүшү керек. Колунда уруксат кагазы жок болсо, эки мамлекеттин тең жарандары Кыргызстанда иштей алышпайт. Бирок учурда каражат табуу үчүн миңдеген чет элдиктер эмгек мигрант болуп региондордо иштеп жатат. Алардын ишмердүүлүгү мамлекеттик органдар тарабынан толук көзөмөлдөнгөн жок, себеби аймактарда Миграция кызматынын бөлүмдөрү жок. Алар каттоого туралы дешсе да мигранттар менен иш алып барган адистер жок болууда. Бул көйгөйдү чечүү үчүн айыл өкмөттөрү менен бирге иш алып баруу керек", — деди Бейшенов.
Ал аймактарга Миграция кызматынын бөлүмдөрүн ачууга каражат жетишсиз экенин кошумчалады.
