БИШКЕК, 5-апр. — Sputnik. "Коопсуз шаар" долбоору ишке киргизилген соң жол кырсыктарынан жабыркагандардын саны өткөн жылга салыштырмалуу 44,4 пайызга азайды. Бул тууралуу ички иштер министри Кашкар Жунушалиев өкмөттүн жыйынында билдирди.
Премьер Мухаммедкалый Абылгазиев өзгөчө белгилегендей, бул долбоорду ишке ашыруунун максаты айып пулдун эсебинен көп каражат жыйноо эмес, жарандардын коопсуздугун камсыздоо жана адам өмүрлөрүн сактоо болуп саналат.
"2019-жылдын 20-апрелине чейин "Коопсуз шаар" долбоорунун экинчи баскычын ишке ашыруу башталат. Жыл аягына чейин бардык ири шаарларда жана республиканын трассаларында видеобайкоо камералары орнотулат. Буга чейин жыл сайын дээрлик миңдей адам жолдордо каза тапкан болсо, бул санды биз эки эсеге кыскарта алсак, анда ушул биздин жеңишибиз болот", — деди Абылгазиев.
Ал ошондой эле айып пулдарды төлөөдөн түшкөн каражаттардын бир бөлүгүн Тез жардам кызматынын техникалык абалын жакшыртууга жумшоо зарылдыгын кошумчалады.
