Президент Сооронбай Жээнбеков Кыргызстандын футбол боюнча улуттук курама командасын кабыл алып, мамлекеттик сыйлыктарды тапшырды.
КРдин Футбол федерациясынын президенти Семетей Султанов өлкө башчыга колдоосу үчүн ыраазычылык билдирди. Ал эми башкы машыктыруучу Александр Крестинин элдин ынтымагын бекемдеген футболдун күчүн баса белгилеп, материалдык-техикалык базаны жакшыртуу керектигин кошумчалады.
Жээнбеков Турсунали Рустамовдун атасы Азия кубогунда жүргөн маалда туулган наристесине белек ыйгарды.
Быйыл Кыргызстандын курама командасы тарыхта биринчи жолу Азия кубогунда ойноду. Тайпалык этапта кытайлыктар менен түштүккореялыктарга жеңилип, үчүнчү оюнда филиппиндиктерди 3:1 эсеби менен жеңген. Муну менен кыргызстандыктар өз тайпасында үчүнчү орунду алып, 1/8 финалга чыккан. Тилекке каршы, чейрек финалга өтө албай, БАЭге 2:3 эсебинде утулуп калган.
