БИШКЕК, 24-окт. — Sputnik. Бишкектеги №66 мектептин директору Минара Якупованы окуучулар менен болгон окуядан кийин иштен алуу маселеси каралып жатат. Бул тууралуу Бишкек мэриянын маалымат кызматынан кабарлашты.
Буга чейин интернет айдыңына окуучу бала башка окуучу балдарды уруп-согуп жатканы боюнча видео тарап кеткен.
Бүгүн эртең менен муниципалитет алдын ала маалымат боюнча мектепте рэкетчилик фактысы аныкталбаганын маалымдаган. Ал эми видеодогу балдар 7 жана 8-класстын окуучулары экени аныкталган. Алардын ортосунда пикир келишпестик жаралганы белгилүү болгон. Окуучулар менен ата-энелер Свердлов райондук ички иштер башкармалыгына чакырылып түшүндүрүү иштери жүргүзүлгөн. Ошондой эле мэр Азиз Суракматов мектеп директорун сүйлөшүүгө чакырары айтылды.
Бишкек ШИИББ өз учурунда жалпыга билим берүү мекемелериндеги рэкетчилик жана баңги затын сатуу фактыларын аныктоо үчүн текшерүүлөрдү күчөтмөй болду.
Мэрия ошондой эле дисциплинардык комиссия Свердлов райондук акиминин орун басарынын, мэриянын социалдык саясат бөлүмүнүн кызматкерлеринин жоопкерчилигин жана №66 мектептин директору менен райондук билим берүү борборунун жетекчисин иштен алуу маселесин карай турганын маалымдады.
