Аталган документ ден соолугунан мүмкүнчүлүгү чектелген же катуу ооруга кабылган мектеп жашындагы балдардын билим алуусун камсыздоо максатында кабыл алынган. Жобо качан ишке кирет жана билим алам деген балдардын ата-энелери эмнелерди билиши керек? Бул тууралуу Sputnik Кыргызстан агенттигине Билим берүү министрлигинин адиси Салтанат Мамбетова айтып берди.
Жобо тууралуу
Кандай документтер керектелет?
Жободо жазылгандай, катуу ооруга кабылган (мисалы, операция болгон) баланын ата-энеси Саламаттык сактоо министрлигинин дарылоо-көзөмөлдөө комиссиясына кайрылса, алар үйдө окуйт деген маалымкат жазып беришет. Ал эми ден соолугунан мүмкүнчүлүгү чектелген балдарга билим берүү тармагындагы психологиялык-медициналык-педагогикалык консультациянын негизинде корутунду чыгышы керек.
Ата-эне ал маалымкатты алып райондук билим берүү бөлүмүнө барат. Аталган бөлүм бала жашаган аймактын мектебине жиберет дагы, ал жерден мектеп жетекчисинин буйругу менен окуучуга атайын мугалим жана окуу планы бекитилет.
Балдар акысыз окушабы?
Балдар акысыз билим алышат. Ал эми баланы үйдөн окуткан мугалимдин айлыгы өзү иштеген мектептин маяна фондусунан саатына жараша төлөнөт. Эгер мектептин мугалим жөнөтүүгө мүмкүнчүлүгү жок болсо, анда башка мугалимди келишимдик негизде саатына жараша төлөп берип жалдаса болот.
Жобо качан иштеп баштайт?
Жобо Кыргызстандын аймактарына да тиешелүүбү?
Өлкөдөгү катуу ооруган же ден соолугунан мүмкүнчүлүгү чектелген бардык балдар жобонун негизинде үйдөн окуй алышат.
Жаш курагы чектелүүбү?
Кадимки балдардай эле 1-класстан 11-класска чейин, башкача айтканда, 7 жаштан 18 жашка чейинки мектеп курагындагы балдар окутулат.
Ооруга байланыштуу бала классынан калып калса кандай болот?
Бул боюнча ата-эне менен мектеп жетекчилиги сүйлөшүп, бир пикирге келет. Баланын жаш курагы менен буга чейин алган билимине жараша окуу программасы түзүлөт. Мисалы, эгер бала 3-класстан тарта ооруп, бир жыл билим ала албай калса, кайра ошол 3-класстын программасы менен окутула баштайт.
Маалымкатты бир эле жолу алабы же жыл сайын жаңыртып туруу керекпи?
Балдардын маалымкатына дарылоо бөлүмүнүн адистери убактысын жазып берет. Мисалы, ал маалымкат бир чейрекке, жарым же бир жылга чейин эле берилет. Эгер ал аралыкта баланын ден соолугу жакшырбаса, ал эми маалымкаттын же корутундунун убактысы бүтүп калса кайра тиешелүү жерлерге барып жаңылап келүү керек.
Балдар кандай окуу программанын негизинде билим алышат?
Үйдө окутула турган балдарга эки окуу программасы түзүлөт. Биринчиси — жалпы билим берүү программасы, экинчиси акыл-эс жагынан өнүкпөй калган балдарга ылайыкталат.
Бир балага бир эле мугалим бекитилеби?
Эгер башталгыч класстын окуучусу болсо бир эле мугалим, эгер чоңураак класс болсо, анда ар бир сабакка өзүнчө мугалим бекитилет. Болгону кээ бир сабактар бириктирилип өткөрүлүп калат. Мисалы, тарых сабагынан берген мугалим адам жана коомдон дагы сабак өтсө болот. Ошондой эле күн тартиби, план жазылып, ар бир балага кадимкидей журнал ачылат.
