БИШКЕК, 24-окт. — Sputnik. Айыл чарба, тамак-аш өнөр жайы жана мелиорация министринин орун басары Жаныбек Керималиев быйыл коңшу мамлекеттерде дагы картошканын түшүмү көп болгондуктан анын баасы түшүп кеткенин парламенттин жалпы жыйынында билдирди.
Бүгүн Жогорку Кеңеш "Үрөн жөнүндө" Кыргыз Республикасынын Мыйзамына өзгөртүүлөрдү киргизүү тууралуу" мыйзамдын долбоорун карады.
"Былтыр, мурдагы жылдары башка мамлекеттерде картошканын үрөнү болбогондуктан баасы жогорку болгон. Быйыл деле былтыркы көлөмдөгүдөй картошка эгилди. Бирок быйыл түшүмдүүлүгү жакшы болду. Былтыр Өзбекстан жана башка коңшу мамлекетте түшүм жакшы болбой калган. Мониторинг жүргүзүп, баалар Кыргызстандагыдай эле болуп жатканын байкадык. Азыр арзан болууда. Былтыр 25-30 сом болсо, быйыл 10-12 сомго бааланып жатат", — деди министрдин орун басары.
Өз кезегинде төрага Дастан Жумабеков Айыл чарба министрлиги үрөндү жакшыртуу боюнча эч кандай иштерди жасабай жатканын айтты. Мисал катары дыйкандар өзүлөрү чет жактан үрөн алып келип аракет кылып жатканын келтирди. Таластын дыйкандары 26 жылдан бери төө буурчактын бир гана уругун сээп келе жатканын белгилеп, министрлик жакшы иш алып барышы керектигин кошумчалады.
Белгилей кетсек, буга чейин парламентте картошканын арзан болуп жатканы тууралуу маселе көтөрүлүп, министрликке сын-пикирлер айтылган.
