БИШКЕК, 12-сен. — Sputnik. Аида Салянованын иниси Улан Саляновду өлтүрүүгө катыштыгы бар деген үчүнчү шектүү жаран Россиядан кармалганын КР ИИМдин маалымат кызматы билдирди.
Аида Салянованын иниси Улан Саляновду өлтүрүүгө катыштыгы бар деген шектүүлөр
© Фото / Пресс-служба МВД КР
Кармалган жаран 1983-жылы туулган, Россиянын жарандыгын алган. Анын кайсы жерде жүргөнү август айында аныкталган. ИИМдин билдиришинче, ал жасагандарын моюнга алып, учурда аны Кыргызстанга алып келүү маселеси чечилип жатат.
Шектүүнү кармоого КР УКМКсы, ИИМ жана Россиянын федералдык коопсуздук кызматы жардам берген.
Эске салсак, 2017-жылдын 6-ноябрга караган түнү болжол менен саат 2.30дарда мурдагы башкы прокурор Аида Салянованын иниси Улан Саляновду өз үйүнөн атып кетишкен.
Ошол эле жылдын 27-декабрында бул кылмышка шектүү катары Бишкектин 31 жаштагы жараны кармалган. Анын жанынан Саляновго ок атылган курал табылган.
Кийин Москва шаарында экинчи шектүү колго түшүрүлгөн.
