БИШКЕК, 28-июн. — Sputnik. Нарын обулусунун Ак-Талаа районундагы Ак-Талчат көпүрөсү ачылып, автоунаалардын өтүүсүнө жол ачылды. Бул туурасында Транспорт жана жолдор министрлигинин маалымат кызматы билдирди.
Белгилей кетсек, былтыр май айында узундугу 141,2 метр, туурасы 5 метр болгон көпүрөнүн ортоңку тирөөчү чөгүп, авариялык абалга кептелген. Мындан улам көпүрөнүн 44,3 метр жери оңдоого муктаж эле. Кайра калыбына келтирүү иштери 15-июнда толугу менен соңуна чыгып, автоунаалар өтүп баштаганы айтылат.
Кийин көпүрөнү оңдоо иштерин министрлик кайрадан колго алып, башка компания менен иштеше баштаган. Көпүрөнү калыбына келтирүү үчүн бюджеттен 44 миллион 454,7 миң сом каралган.
Буга чейин УКМК дал ушул көпүрөгө байланыштуу кызматтык абалынан кыянаттык менен пайдалануу фактысы боюнча Жол чарба департаментинин директору Арстанбек Ибраевди кармаган.
