УКМК дагы бир аткаминерди коррупцияга айыптап колго түшүрдү

БИШКЕК, 7-мар. — Sputnik. Транспорт жана жол министрлигинин кызмат адамдарына карата козголуп, тергелип жаткан кылмыш ишинин алкагында кызматтык абалынан кыянаттык менен пайдалануу фактысы боюнча Жол чарба департаментинин директору Арстанбек Ибраев кармалды. Бул тууралуу УКМКдан маалымдашты.

Билдирмеге караганда, Ибраев Нарын облусуна караштуу Ак-Талаа районунун Ак-Талчат айылындагы "Нарын суусу аркылуу көпүрө" объектисиндеги калыбына келтирүү иштеринин буюртмаларын аткаруу үчүн мыйзамсыз түрдө өзүнө тиешеси бар "Кербенжолкурулуш" ААКсына 45,8 миллион сом ыйгарып берген.

"2017-жылдын июль айында Ибраевдин көрсөтмөсү боюнча "Кербенжолкурулуш" ААКсынын эсебине банктын кепилдиги жок эле мыйзамсыз түрдө 35,3 миллион сом алдын ала которулган. Андан ары бул каражаттар коротулуп кеткени менен азыркы маалга чейин курула турган көпүрө ишке бериле элек", — деп айтылат маалыматта.

Буга байланыштуу Арстанбек Ибраев Биринчи Май райондук сотунун чечими менен убактылуу кармоочу жайга киргизилди. Ошондой эле ага карата Кылмыш жаза кодексинин 304-беренесинин 2 жана 3-бөлүгү (кызматтык абалынан кыянаттык менен пайдалануу), 306-беренесинин 2-бөлүгү (Кыргызстандын кызыкчылыктарына каршы келишим түзүү, мамлекеттик сатып алууну мыйзамсыз жүзөгө ашыруу) жана 189-беренеси (ачык соода-сатыктарды, аукциондорду же тендерлерди өткөрүүнүн тартибин бузуу) боюнча кылмыш иши козголду. Учурда тергөө амалдары жүрүп жатат.

УКМК буга чейин "Электр станциялары" ишканасынын техникалык директору менен ишкананын жетекчисинин мурдагы орун басарын кармаган болчу.