БИШКЕК, 21-май — Sputnik. Жекшембиде өлкөдө Энелер күнү белгиленди. Майрамга карата милиция кызматкерлери апаларына телефон чалса, жаш жигит автобустун ичинде ырдап куттуктады. Ал эми ханзада Гарри менен акриса Меган Марклдын үйлөнүү үлпөтү кыргызстандыктардын да талкуусуна түштү.
1. Жашыган милиционер. Жол кыймылы коопсуздугун камсыздоо башкы башкармалыгынын кызматкерлери өз апаларын Энелер күнү менен куттуктап, аларды канчалык жакшы көрөрүн айтышты. Аягында милиционерлердин бири апасынын үнүн укканда көзүнө жаш тегеренип кеткенин көрүүгө болот. Видеодо Толгонай Арзыкееванын аткаруусундагы "Эне жөнүндө баллада" ыры колдонулган.
2. Автобуста ырдаган өспүрүм. Ал эми Шамил Кыязов Ош шаарында эл ташыган автобуска түшүп алып аккордеондун коштоосунда "Эне жөнүндө баллада" ырын аткарган. Ал видеону Instagram баракчасына жүктөп "Кыргызстандагы бардык апаларды куттуктайм" деп жазган. Эсиңиздерде болсо керек, Шамилдин буга чейин интернетте "оштук Витас" деп атагы чыккан.
3. Энелик бакыт. Экс-президенттин кызы Алия Шагиева да баласы менен түшкөн сүрөттөрүн жарыялып, куттуктоо сөзүн жазды. Анда ал аялдар перзенттүү болгондон кийин жашоосунда бир топ өзгөрүүлөр болорун белгилеген. "Ар бир энеге баласы баарынан ширин сезилет. Бала жытын жыттап, аны тарбиялап өстүрүү чоң бакыт. Өзүңүздөрдү жакшы караңыздар!" деп жазган.
4. Дүңгүрөгөн той. Ишемби күнү Британиянын ханзадасы Гарри менен америкалык мурдагы актриса Меган Марклдын үйлөнүү үлпөтү өттү. Анда чиркөөгө 600 киши келген. Никеге тургандан кийин алар үстү ачык ат чегилген аземдүү араба менен эл турган көчөдөн өтүштү. Кечинде жаш жубайлардын урматына эң жакын делген 250 кишиге сый тамак берилди. Алардын тоюн кыргызстандыктар да талкууга алышты.
5. Жарамазанчы тестиер. Интернет айдыңында кыргызстандык баланын жарамазан айткан видеосу тарап жатат. Роликти бир топ киши көрүп, көбүнчөсү бөлүшкөн. Комментарийлерде эл баланын үнүнө баа берип алкоодо.
6. Горшок үстүндөгү маек. Эмнелерди сүйлөшүп жатканы белгисиз, бирок бир чоң маселени талкуулап жатканы байкалат. Бөбөктөрдүн маеги соцтармак колдонуучуларын күлкүгө бөлөп, жүрөгүн элжиретүүдө.
7. Кошумча кандай берилет? Эгер тойго келген коноктордун кониверттеги кошумчасынын суммасы канча экенин башкалар көрүп турса кандай болмок? Бул видеодо ким эмне алып келгени кыймыл-аракетине карап бааланган.
