Жыйын жабык эшик артында өтүп, ага журналисттер киргизилген жок. Жолугушуу бүткөндөн кийин Шаардык транспорт башкармалыгынын жетекчисинин орун басары Нурлан Атыканов чыгып кырдаал тууралуу маалымат берди.
Ага чейин иш таштоого чыккандар бир нече талаптарды коюп, анысы аткарылмайын каттамга чыкпай турганын айтышкан.
"Айдоочулардын 50-60 пайызы эле камсыздандыруу полисин алганга үлгүрүптүр. Ошон үчүн мөөнөтүн бир-эки жумага узартып турууга аракет кылабыз. "Жол инспекторлору аша чаап, айып пул салып жатат" дегени боюнча Жол кыймылы коопсуздугун камсыздоо боюнча шаардык башкармалыктын начальниги маселени чечип берерин айтты. Ал эми тарифтер бир күндө чечилчү нерсе эмес. Жакшылап эсептеп чыгып, анан бир жыйынтыкка келебиз дедик. Бирдиктүү форма өз ара макулдашылган болчу. Мындан баш тарткандарга эч ким чара колдонбойт. Экинчи тилкеден бурулуу боюнча жолчулар карап чыгып, коопсуз жерлерден гана бурулууга уруксат беребиз дедик", — деди Атыканов.
Ал эми иш таштоону кимдер уюштурганы аныкталган эмес, бул боюнча башка кызматтар да иш алып барып жатканын айтты. Айдоочуларды "каттамга чыккан маршруткалардын терезесин таш менен талкалап кетебиз" деп коркутушкан. Бирок бул боюнча фактылар катталган жок.
Сүйлөшүүлөрдүн натыйжасында фирманын жетекчилери эл ташыган айдоочуларды бүгүн кечке чейин ишке чыгарууга макул кыларын айтышкан.
Маршрутка айдоочуларынын иш таштоосуна байланыштуу кырдаалга Sputnik Кыргызстан агенттиги жүргүзүп жаткан тексттик трансляциядан көз салып туруңуз.
