Бешбармакты жасоого 40 ашпозчу, 30 жардамчысы менен кошулуп жалпы жонунан 70 ашпозчу тартылган. Аны даярдоого 650 килограмм таза тууралган эт, 700 килограмм камыр кетти. Камыр менен эт алдын ала чакан казандарда бышырылган. Ал эми чучукту эт азыктарын кайра иштеткен компаниялардын бири жасап келген. Улуттук тамактарды даярдоого тогуз жылкы союлган. Буга чейин сегиз жылкы союлары айтылган, бирок ашыгы менен болсун деп кошумча дагы бир жылкы алынган.
Бешбармак үчүн атайын чоң казан жасалган. Анын диаметри 3 метр, салмагы 438 килограмм. Салмакты өлчөө үчүн казандын астына тараза коюлуп, аны көтөрүп-түшүрүүгө ылайыкталып атайын домкрат жасалган.
Аталган демилгени "Кыргыз тилектештиги" коомдук бирикмеси көтөрүп чыгып, бир нече компаниялардын демөөрчүлүгү астында жүзөгө ашырылды.
Гиннестин рекорддор китебине каттоо үчүн арыз берилген. Даярдоо иштерине ал жактан өкүлдөр келип көз салып жатышты. Гиннеске каттоо боюнча расмий жооп 15 күндүн ичинде келет.
Белгилей кетсек, буга чейин Казакстанда 765 килограмм бешбармак, 100 метр чучук жасалып Гиннестин рекорддор китебине киргизилген. Ал эми Өзбекстанда 6 тонна палоо жасалган.
