БИШКЕК, 17-фев. — Sputnik. Эл ташыган маршрутканы башкарып бара жатып планшеттен видео көргөн айдоочу Эсенбек Тиленчиев Sputnik Кыргызстан агенттигинин кабарчысына окуя тууралуу айтып берди.
Айдоочунун эреже бузуп жаткан учурун видеого тартып алган жүргүнчү окуя 16-февраль күнү кечки саат 19.00дөр чамасында №204 маршруттун салонунда болгонун айткан.
"Акыркы токтоочу жайга жетейин деп калганбыз. Жанымда бараткан байкемдин кызы видео көрөм дегенинен коюп бердим эле. Негизи ал планшеттерди алдыда-артта келе жаткан кесиптештерибизди көрүп туруу үчүн колдонобуз. Мен шаардын ортосунда жүргөндө кино коюп алсам башкалар менин кайсы жерде жүргөнүмдү көрбөй калат да", — деди Тиленчиев.
Ошондой эле ал клип же кино эмес, куудулдардын тамашасын жети мүнөткө эле койгонун айтат.
Окуяны түшүндүрүп бүткөн соң ал эми мындай нерселерди кайталабоого убада берди.
Эске салсак, аптанын башында борбор калаада эки жашар кызын көтөрүп бара жаткан келинди бус сүзүп кетип, аял ошол жерден көз жумган. Ал эми дарыгерлер аман калган наристенин бир бутун кесүүгө аргасыз болушкан.
