БИШКЕК, 14-фев. — Sputnik. Борбор калаанын Токтогул жана Абдрахманов көчөлөрүнүн кесилишинде маршрутка менен Subaru Forester унаасы кагышты. Бул туурасында Sputnik Кыргызстан агенттигине окуяга күбө болгон Айбек Баратов билдирди.
Анын айтымында, маршуртка жол чырак кызыл күйгөндө өтүп кеткендиктен каптал жагынан унаа сүзгөн.
“Мен Абдрахманов көчөсү менен маршрутканын артында бара жаткам. Аралык 100 метрдей болчу. Токтогул көчөсүнө келгенде жол чырак кызыл күйгөндө токтобой өтөм дегенде ары жактан келген жеңил унаа маршрутканын арткы капталын сүздү. Маршрутка 60 метрдей сүрүлүп барып жол четиндеги тосмону сүзүп токтоду. Болжол менен 20 жаштагы жигиттин башы жарылып “Тез жардам” аны биринчи алып кеткен. Андан башкалары да жаракат алганын айтып жатышты. Ичиндеги жүргүнчүлөр да айдоочу катуу айдап келгенин билдирди”, — деди күбө.
Ошондой эле жаракат алгандар маршрутканын жүргүнчүлөрү экенин кошумчалады.
Аталган даректе жол кырсыгы катталганын Жол кыймылы коопсузугун камсыздоо боюнча башкы башкармалыгы да тастыктап, үч адам жаракат алганын маалымдады.
“Тез жардам” кызматы да үч киши ооруканага жеткирилгенин ырастады.
Жеринде милиция кызматкерлери иш алып барууда.
