БИШКЕК, 9-фев. — Sputnik. Бүгүн, жума күнү Кыргызстанда "Токтогул ГЭСин реабилитациялоо" долбоорунун экинчи фазасын ишке ашыруучу келишимге кол коюлат. Бул тууралуу Бишкектеги Азия өнүгүү банкынын кеңсесинен кабарлашты.
Документке кол коюу иш-чарасы "Электр станциялары" ААКсынын кеңсесинде өтөт.
Азия жана Евразия өнүгүү бактары каржылай турган бул долбоордун алкагында Токтогул ГЭСиндеги төрт агрегат алмашат.
"Жаңы агрегаттар ГЭСтин ишин жакшыртып, кубаттуулугун 240 МВтка көтөрөт. Ошондо Токтогул ГЭСинин жалпы кубаттуулугу 1 440 МВтка жетет", — деп айтылат билдирүүдө.
Белгилей кетсек, гидроэлектрстанция 1973-жылы салынган. Токтогул — Орто Азиядагы эң ири суу сактагыч болуп саналып, Кетмен-Төбө өрөөнүндө Нарын суусунда жайгашкан.
Плотинасынын бийиктиги 215 метрге жеткен ГЭСтин асмандан кандай көрүнөрүн Sputnik Кыргызстан агенттигинин "Ажайып Кыргызстан" долбоорунан баам салсаңыз болот.
