БИШКЕК, 20-янв. — Sputnik. Өзбекстандык жарандардын Казакстандын Актөбө облусундагы өрт кырсыгынан мертиниши мекенинде жумушка орношуу шарттарынын жоктугун далилдеди. Бул тууралуу өлкө президенти Шавкат Мирзиёев Сурхандарья облусуна болгон иш сапарынын алкагында Хаким Термизи мавзолейине барган учурда айтканын РИА Новости жазып чыкты.
Эскерте кетсек, 18-январь күнү Самара — Шымкент унаа жолунун 1068-чакырымында, Калыбай айылынан 10 чакырым алыстыкта болгон. "Икарус" үлгүсүндөгү автобус жүрүп бара жаткан жеринен өрттөнүп, 57 кишинин бешөө гана аман калган. Мертингендердин баары Өзбекстандын жарандары экени аныкталган. Казакстандык үч айдоочу менен жаракат алган дагы эки өзбекстандык жүргүнчү учурда сурак берип жатат.
"Каргаша көп нерсени ачыкка чыгарды. Эл алдында жасай турган ишибиз көп экенин көрсөттү. Биз тийиштүү шарт түзүп бере албагандыктан жарандарыбыз башка мамлекеттен иш издөөгө аргасыз болуп жатканын айгинеледи", — деди Мирзиёев.
Өзбекстандын Тышкы иштер министрлигинин маалыматы боюнча 20-январга караган түнү атайын борт менен каза болгондордун сөөгү Ташкент шаарына алып келинген.
Буга чейин кырсык автобус ичиндеги каңдоочу лампанын пайдаланылышынан келип чыкканы божомолдонгон.
