БИШКЕК, 15-янв. — Sputnik. Премьер-министр Сапар Исаков өлкөдөгү криминалдык абалды талкуулап, жумушчу кеңешме өткөрдү. Бул тууралуу өкмөттүн маалымат кызматы билдирди.
Исаков криминалдык аракеттер калк арасында бир топ кооптонууларды жаратып жатканын айтып, буга байланыштуу тийиштүү мамлекеттик органдар тарабынан жарандардын коопсуздугу талаптагыдай камсыздалышы керектигин баса белгиледи.
ИИМ башчысы Улан Исраилов бүгүнкү күндө ички иштер органдары негизги басымды кылмыштарды иликтөөнүн сапатын жогорулатууга, аларды жакшыртууга, ошондой эле укук бузууларга жол бербөөгө жана алардын алдын алууга жасалып жатканына токтолду. Министр ошондой эле өлкөдөгү резонанстуу жана өзгөчө оор кылмыштардын бетин ачууга өзгөчө көңүл бурулуп жаткандыгын маалымдады. Андан сырткары, кылмыштардын басымдуу бөлүгү Бишкек шаары менен Чүй облусуна туура келерин айтты.
Өкмөт башчы кылмыштарды каттоого алуунун бирдиктүү маалыматтык базасын ишке киргизүүдө ички иштер органдарынын ишинин ачыктыгын жогорулатууга жана аны бир кыйла жеңилдетүүгө мүмкүндүк берерин билдирди. Ошол эле учурда "Акылдуу шаар" долбоорунун ишке ашырылышы да өлкөдөгү кылмыштуулуктун бетин ачууну жогорулатууга көмөктөшөрүнө токтолду.
Белгилей кетсек, акыркы учурда жай тургундарга кол салуу, өз үйүнөн өлтүрүп кетүү фактылары көп катталууда. Беловодское айылында жаңы жылдын түнүндө эне менен кызы өлтүрүлгөн. Кылмышкерлер үй ээсинде 100 миң сом бар деген маалымат алышкан. Бул кылмышка шектүү катары алты киши кармалган.
Ал эми 28-декабрда Токмок шаарында белгисиз кишилер үй-бүлөгө кол салып, туугандардын бири алган жаракатынан окуя болгон жерде каза болсо, экинчиси ооруканадан үзүлгөн.
7-январда болсо Ысык-Көл облусунун Бостери айылындагы "Осьминог" рестораны күйүп кеткен. Анын ээси имаратты уюшкан кылмыштуу топтун мүчөлөрү өрттөп кетиши мүмкүн деген оюн билдирген.
