БИШКЕК, 22-дек. — Sputnik. Премьер-министр Сапар Исаков V Азия оюндарынын катышуучуларына сыйлык тапшырды.
Иш-чара кечээ, 21-декабрда президенттик резиденцияда өткөн.
Сыйлык улуттук курама команданын спортчуларына, машыктыруучуларына жана уюмдарга тапшырылды.
Сапар Исаков курама команданын ийгиликтүү оюн көргөзгөнү менен куттуктап, жогорку жыйынтыктар үчүн ыраазычылык билдирди.
"Сиздер өтө жакшы ийгиликке жетиштиңиздер. Азия оюндарында мындай чоң жетишкендик алгач ирет болууда. Сиздердин көрсөткөн жыйынтык, ата мекендик спортчулардын мүмкүнчүлүгү жогору экендигин тастыктап турду", – деди Исаков.
Эске сала кетсек, жабык имараттагы V Азия оюндары 17-27-сентябрь аралыгында Түркмөнстандын борбору Ашхабад шаарында өткөн. Анда Кыргызстан улуттук курама командасынан 153 спорчту 17 спорттун түрү боюнча оюн көргөзүп, жыйынтыгында 13 алтын, 20 күмүш жана 37 коло медалга ээ болушкан.
