БИШКЕК, 21-дек. — Sputnik. Көк бөрү салттуу ат оюндарынын ЮНЕСКОнун материалдык эмес маданий мурастар тизмесине Кыргызстандын атынан киргизилиши – жалпы кыргыз эли үчүн зор жетишкендик. Мындай пикирин премьер-министр Сапар Исаков улуттук оюнду ЮНЕСКОнун тизмесине көрсөтүүгө жана ага даярдык көрүүгө салымын кошкон жумушчу топту сыйлап жатып билдирди.
Премьер Кыргызстандын ЮНЕСКО иштери боюнча улуттук комиссиясына, Көк бөрү федерациясына жана курама команданын спортчуларына улуттук оюнду жайылтууга жана кыргыз тарыхын жана маданятын даңазалоого кошкон салымы үчүн өзгөчө ыраазычылык билдирди.
"Мен биздин спортчуларга жаңы ийгиликтерди, анын катарында эл аралык аренадагы жетишкендиктерди кааалайм. Келерки жылы III Дүйнөлүк көчмөндөр оюндары өтөт жана жалпыбыз сиздерден жаңы жеңиштерди күтөбүз. Сиздерге ар дайым өлкөбүздүн желегин бийик көтөрүп жүрүүңүздөрдү каалайм", — деди Исаков.
Белгилей кетсек, декабрь айынын башында көк бөрү оюну Кыргызстандын атынан ЮНЕСКОнун материалдык эмес маданий мурастар тизмесине киргизилген.
