БИШКЕК, 14-дек. — Sputnik. Ош шаарындагы Жапалак айылдык аймактык башкармалыгынын Тээке айылында бала бакчанын курулушу пландалууда. Бул тууралуу Ош шаарынын мэри Айтмамат Кадырбаев Жапалак аймагынын эли менен жолугушуп жатып билдирди.
Шаар жетекчиси жаңыдан пайдаланууга берилген №45 орто мектептин эски имараты менен таанышып, өсүп келе жаткан жеткинчектердин билим алуусуна ыңгайлуу шарттарды түзүү үчүн бала бакчаларды куруу замандын талабы экендигине токтолду.
Кадырбаевдин айтымында, учурда Ош шаарында 41 бала бакча бар. Анда 14 500гө жакын жаш бала тарбияланат. Мындан сырткары, 25 жеке менчик бала бакчада 1200дөн ашуун бөбөк билим алат.
"Бала бакчанын жетишсиздигин шаардыктар жакшы билет. Калааны өнүктүрүүнүн негизи багыттарынын бири — жаңы бала бакчаларды, мектептерди куруу болуп эсептелет. Жапалак айылдык аймактык башкармалыгынын Тээке айылында жакында эле 275 орундуу жаңы мектеп куруп, пайдаланууга берилди. Ушул мектептин эски имаратын толугу менен капиталдык оңдоп-түзөөдөн өткөрүп, жаңы бала бакча курууну пландап жатабыз", — деди Кадырбаев.
Шаар жетекчиси курулуш иштерине тиешелүү маселелер боюнча тийиштүү комиссияга тапшырмаларды берди.
