БИШКЕК, 30-ноя. — Sputnik. АКШ президенти Дональд Трамп Түндүк Кореяга карата жаңы санкцияларды кабыл аларын өзүнүн Twitter тармагындагы баракчасына жазды.
Just spoke to President XI JINPING of China concerning the provocative actions of North Korea. Additional major sanctions will be imposed on North Korea today. This situation will be handled!
— Donald J. Trump (@realDonaldTrump) 29 ноября 2017 г.
Эске салсак, шаршембиге караган түнү Япония жана Түштүк Кореянын аскерлери Түндүк Корея тарабынан рекета учурулуп, анын Япониянын жээктеринен 210 чакырым алыстыкта кулаганын аныкташкан.
Көп өтпөй Түндүк Кореянын бийлиги АКШнын аймагындагы каалаган бутага жетчү баллистикалык ракетасын сыноодон ийгиликтүү өткөргөнүн жар салган.
"Мен азыр эле Кытайдын президенти Си Цзиньпин менен Түндүк Корея тарабынан жасалып жаткан чагымчылык аракеттер тууралуу сүйлөштүм. Бүгүн Түндүк Кореяга каршы санкциялар жарыяланат. Кырдаал көзөмөлдө!" — деп жазды Трамп.
Ак үй президент Трамп Түндүк Корея тараптан АКШга жана өнөктөштөрүнө туулуп жаткан коркунучтан сактануу керектигин баса белгилегенин айтты. Ошондой эле ал Си Цзиньпинди Пхеньянды "эсине" келүүгө мажбурлаган мүмкүнчүлүктөрдү пайдаланууга чакырды.
Трамптын айтымында, Кытайдын башчысы Түндүк Корея менен ядердик көйгөйдү сүйлөшүү жолу менен чечүүгө даяр.
