БИШКЕК, 29-ноя. — Sputnik. Түндүк Корея, өздөрү айткандай, АКШ аймагындагы каалаган бутасына жете турган "Хвасон-15" баллистикалык ракетасын сыноодон ийгиликтүү өткөргөнүн жергиликтүү телеканалдарга шилтеме берип РИА Новости жазды.
Шаршембиге караган түнү учурган ракета Япониянын жээктеринен 210 чакырым алыстыкка кулаганы айтылган. Бирок анын кесепети тууралуу кабар берилген жок.
Көп өтпөй, тагыраагы, ошол эле сааттарда жооп катары Түштүк Корея дагы аба, жөө жана деңиз аскерлеринин ракетасын сыноолор боюнча окуусун өткөрдү.
"300 чакырымдык "Хёнму-2", миң чакырымдык "Хэсон-2" жана 57 чакырымдык "Спайс-2000" ракеталары учурулду. Булар Түндүк Кореядагы "чекиттик" соккуларга багытталган курал", — деп айтылат билдирүүдө.
Эске салсак, Россия менен Кытай Түндүк Кореяга ядердик сыноолорго мораторий жарыялоону, ал эми Түштүк Корея менен АКШга региондо аскердик окууларды токтотууну сунуштаган. Бирок Вашингтон бул демилгеге жооп кайтарган эмес.
