БИШКЕК, 27-ноя. — Sputnik. 110 кВ "Главная-Кызыл-Аскер" электр зымдарынын үзүлүшү Бишкек шаары менен Чүй облусунда электр энергиясынын авариялык өчүүсүнө алып келди. Бул тууралуу "Түндүкэлектр" ААКтын маалымат кызматы билдирди.
Ага ылайык, жекшемби күнү, 26-ноябрда, саат 23:48де борбор калаанын түндүк-батыш бөлүгү — Батыш автобекети, Ош базары, Кызыл Аскер жана Газ шаарчалары, 110 квартал, Достук кичирайону жарыксыз калды.
Чүй облусунда Маевка, Пригородное, Новопавловка, Венно-Антоновка айылдарында да жарык өчкөн. Дүйшөмбү күнү, 27-ноябрда, саат 07:00 дө жогоруда аталган участоктордун жарыгы толугу менен калыбына келтирилген.
