БИШКЕК, 21-ноя. — Sputnik. Кытайлык ишкерди тоноо үчүн эки киши анын үйүнө кирип келгенин Чүй ОИИББдин маалымат кызматы билдирди.
Милиция кайсы бир топ чет элдик жаранга кол салууну пландап жатканы боюнча ыкчам маалымат алган. Аны текшерүү учурунда кылмышка шектелгендер Чүй облусунун 20-25 жаштагы жарандары экени аныкталган.
Кармалгандар өз курмандыгын аңдып, ал тууралуу маалыматтарды топтойт деген ыкчам маалымат болгон. Алар кытайлык ишкерди тоноону пландап жүргөн.
Ыкчам топтун өкүлдөрү ишкердин үйүндө кылмышкерлерге тор жайышкан. 17-ноябрдын түнүндө куралданган кылмышкерлер капюшон кийип, чет элдик жарандын үйүн тоноого келишкен.
Кармоо учурунда алар каршылык көрсөтүшкөн. Атайын кызматтын аскерлери менен милиция ок атуучу курал менен аскер самбосунун ыкмаларын колдонууга аргасыз болушкан.
Кылмыш болгон жерди тинтүү учурунда кармалгандардын бирине таандык тапанча табылган.
Ыкчам маалыматтарга ылайык, кармалган жарандар уюшкан кылмыштуу топ менен байланышып жүргөн.
Аталган факты боюнча Кылмыш жаза кодексинин 168-беренеси ("Каракчылык") боюнча кылмыш иши козголду.
Кармалгандар соттун чечими менен эки айга убактылуу кармоо жайына киргизилди.
Милиция учурда кылмышка тиешеси бар башкаларды издеп жатат.
