БИШКЕК, 17-ноя. — Sputnik. Кара-Кулжа районунун Биринчи Май айылында чоң той өткөрүлүп, анда бейгеге карышкыр коюлду. Бул маалыматты той ээси, "Бүркүт" көк бөрү командасынын капитаны Жандарбек Төрөев тастыктады.
Sputnik Кыргызстан агенттигине айтып бергенине караганда, ал балдарына сүннөт той берген.
"Мен бир нече тойду бир өткөрдүм. Үч уулумду сүннөткө отургузуп, аны менен катар үй той бердим. Тойго канча киши келгенин санаган деле жокмун, башкалар төрт миңге жакын конок келди деп айтып жатышат. Карышкырды мага тойдун алдында айылдаштарым белек кылган. Аны көк бөрүгө койгон байгелеримдин арасына кошуп койгом", — деди Төрөев.
Жарткыч көк бөрүдөн мыкты оюн көрсөткөн Жаныш Ниязовго тийди.
"Карышкырды утуп алганыма кубанычтамын. Бирок ал мага кереги жок. Ошол себептен аны келерки тойдо байге катары коем", — деди ал.
Белгилей кетсек, мурдараак Баткендин Исфана шаарындагы мал базарга жергиликтүү тургун тирүү карышкыр алып чыккан. Учурда ал киши изделүүдө.
Байгеге коюлган карышкыр ошолбу же ал эмеспи, азырынча белгисиз.
