БИШКЕК, 10-ноя. — Sputnik. Чүй ОИИББи "Инкар-Йакын" кыймылынын мүчөлөрү Кыргызстандын мыйзамдарына баш ийбей, динди жайылтуу иштерин мечиттин имамдары менен макулдашпастан ишке ашырып келет деген маалыматты таратты.
Экстремисттик делген корутунду чыгарылган
Дин иштери боюнча мамлекеттик комиссиянын адиси Эсенгелди Жумакуновдун айтымында, бул кыймылдын өкүлдөрү дааватка чыгуу үчүн муфтияттан уруксат кагаз алуу сүннөткө (Муххаммед пайгамбардын кылган ишине — ред.) туура келбейт деп эсептешет.
"Андан сырткары, алар балдарын окутпайт, медицина кызматын колдонбойт. Дин иштери боюнча мамлекеттик комиссиянын эксперттери ушул жагдайларды эске алып, "Инкар-Йакын" кыймылын экстремисттик деп корутунду чыгарган. Себеби убакыттын өтүшү менен алар радикалдашып өз катарына көп адамдарды тартып, андан соң өзүнүн пикирин күч менен дагы көрсөтүшү мүмкүн", — деди Жумакунов.
Алар жөнөкөй эле мусулмандар…
"Ошондон кийин аалымдар кеңешип бирдиктүү кийим кабыл алынган. Бирок ага саналуу адамдар каршы чыгып, муфтият иштеп чыккан формага макул болгон эмес. Мындан улам алардын дааватка чыгуусуна тыюу салганбыз. Андан соң алар өзүм билемдик менен дааватка чыга баштаган. Ал эми идеологиялык жагынан айтсак, инкар-йакынчылар жөнөкөй эле мусулмандар, эч жерден келген эмес, көпчүлүгү жергиликтүү эле тургундар. Алардын халифат куруу, бийликти басып алуу өңдүү радикалдык максаты деле жок", — деди Сайпиев.
Ошондой эле ал диний чөйрөдө тартип болуусу үчүн калк арасында түшүндүрүү иштери жүрүп жаткандыгын кошумчалады.
ИИМ эмне дейт?
Милиция тараткан билдирүүсүндө "Инкар-Йакын" кыймылынын мүчөлөрү эч бир мыйзамга баш ийбей, динди жайылтуу иштерин мечиттин имамдары менен макулдашпастан ишке ашырып жатканы, натыйжада мечиттерде вертикалдык кош структура пайда болгонун айтат.
Эске сала кетсек, Кыргызстанда 21 диний агым жана бир адамдын үгүт материалдарына тыюу салынган. Жалпы жонунан өлкө аймагында 3150 диний уюм катталган.
