БИШКЕК, 12-май — Sputnik. Көз карандысыз мамлекеттердин шериктештигине кирген өлкөлөрдө торрорчулардын жалпы маалыматтык базасын түзүү каралууда. Бул тууралуу Sputnik Белоруссия Минскиде өтүп жаткан КМШ өлкөлөрүнүн пенитенциардык кызматынын жетекчилер кеңешмесинде Россиянын Жаза аткаруу федералдык кызматынын директорунун орун басары Валерий Максименко билдиргенин жазды.
Жыйында бир нече документтерге кол коюлары күтүлүүдө. Анда КМШ өлкөлөрүндө жаза аткаруу тармагында кызматташууну күчөтүү жана коопсуздукту орнотуу каралган.
Жалпы маалыматтык базаны жыл соңуна чейин түзүү пландалууда.
"Кеңешменин маанилүү долбоорлорунун бири —террорчулук жана экстремизм боюнча жалпы маалыматтык база түзүү. Мындай аракет теракт жасагандардын башка өлкөлөргө өтүп ишин улантуусуна бөгөт коюлат", — деди Максименко.
КМШга кирген өлкөлөрдүн пенитенциардык кызматынын жетекчилер кеңеши 2015-жылдын октябрь айында түзүлгөн. Анын курамына Армения, Белоруссия, Казакстан, Россия жана Кыргызстан кирет. Бул курамга кирүүгө Тажикстан дагы кол коюп, учурда макулдашуу ратификацияланууда.
