Каракол шаарында аялдаманы бүлдүргөн киши кармалды

БИШКЕК, 12-сен. — Sputnik. Каракол шаарындагы Токтогул жана Абдрахманов көчөлөрүнүн кесилишиндеги аялдаманы кесип кетти делген киши кармалды. Бул тууралуу Ысык-Көл ОИИББдин маалымат кызматы билдирди.

Белгилей кетсек, 5-сентябрь күнү белгисиз адамдар аталган аймакка орнотулган аялдаманын түркүгүн темир ширетүүчү аппарат менен кесип, жараксыз абалга келтиришкен.

Аталган факты боюнча Каракол шаардык мэриясы милицияга кайрылган.

"Окуя болгон жерге келген тергөө-ыкчам тобу күбөлөрдү сураштырып, 5-сентябрь күнү болжол менен саат 19.30-20.30 аралыгында Токтогул көчөсүнүн түндүк тарабында жайгашкан аялдаманын түркүгүн атайлап кесип, бүлдүрүп кеткендигин аныкташкан. Келтирилген чыгым 142 246 сомду түзгөндүгү тастыкталды", — деп айтылат маалыматта.

Көрүлгөн ыкчам-иликтөө иштердин натыйжасында аталган кылмышка шектелип, жер тилкесинин ээсинин баласы, 43-жаштагы Каракол шаарынын тургуну кармалган. Анын айтымында, аялдама орнотулган жер тилкеси энесине таандык экендигин, ошондой эле жеке ишкерлерге ижарага берип жүргөнүн билдирген. Ал темир ширетүүчү устаны жалдап, аялдаманы өзүм билемдик менен кестирип салгандыгын моюндаган. Андан сырткары, ал келтирилген чыгымды толук төлөп берүүгө милдеттендирилди.

Бул факты Кылмыш жаза кодексинин 174-беренеси (Мүлктү атайылап жок кылуу же зыянга учуратуу) менен кылмыш иши козголгон. Азыркы учурда тергөө амалдары жүрүп жатат.