БИШКЕК, 4-авг. — Sputnik. Ак үй АКШ президенти Дональд Трамптын сүйлөшкөндөрү сыртка чыгып кеткенине нааразы. Бул туурасында Ак үйдүн маалымат катчысынын орун басары Линдси Уолтерс журналисттерге айтканын РИА Новости жазды.
"Телефон чалуулардын, сүйлөшүүлөрдүн басма сөзгө чыгып кетиши — улуттук коопсуздук маселеси. Бул президенттин жасап жүргөн эң сонун иштеринин бири — чет мамлекеттердин башчылары менен сүйлөшүүлөрдү жүргүзүүсүнө тоскоол болот", — деген Уолтерс.
Кышында Трамптын Мексика жетекчиси Энрике Пенья Ньето жана Австралия премьер-министри Малькольм Тернбулл менен сүйлөшүүлөрү басылмаларга чыгып кеткен.
АКШнын баш прокурору Жефф Сешнс жума күнү маалымат жыйынын өткөрүп, администрациядан маалыматты сыртка чыгарып жибергендерди издөө боюнча кылган аракеттери туурасында отчет бермекчи. Азырынча андай иштер майнабын бере элек.
