БИШКЕК, 27-июл. — Sputnik. Жалал-Абаддын Ала-Бука районунда жайгашкан "Шах-Фазиль" тарыхый-архитектуралык комплексин реставрациялоонун экинчи этабы башталды. Бул тууралуу Маданият, маалымат жана туризм министрлиги билдирди.
Белгилей кетсек, XI-XII кылымга таандык мавзолей алгачкы жолу 1967-жылы реконструкцияланган. Кийинчерээк, убакыттын өтүшү менен нымдуулуктан комплекс акырындап бузулуп, ичиндеги жазуулары, оюу-чийүүлөрү урай баштаган.
Мындан улам оңдоп-түзөө иштеринин биринчи этабы 2014-2015-жылы жүргүзүлүп, мавзолейдин төбөсүн реставрациялоо, пайдубалын гидроизоляциялоо жана эстеликтин ичиндеги нымдуулукту тиешелүү түрдө сактоого багытталган иштер жасалган.
Ал эми экинчи этабынын жумушчу аталышы "Шах-Фазиль мавзолейинин реставрациялоо жана архитехтуралык ички жасалгасынын түстүү оюу-чүйүүлөрүн калыбына келтирүү" деп аталат. Долбоордун негизги максаты тарыхый комплекстин тамтыгы чыгып калган ички жасалгасын реставрациялоо болуп саналат.
Оңдоо иштерин ушул жылдын аягына чейин бүтүрүү пландалган.
"Шах-Фазиль" мавзолейи турган жер — Фергананын шахы Караханиддер доорундагы башкаруучу Махмуд ибн-Насырдын коюлган жери. Бул жер мусулмандардын зыярат кылчу жайына айланган.
Уламыш боюнча Кыргын-Мечитте 2 772 араб аскери намаз окуп жатканда кол салуу болуп, жоокерлердин баары мууздалган. Кыргындан соң Булан аттуу кыз кесилген баштарды жууп, арасынан сүйүктүүсүн табууга аракет кылып, бардык аскерлерди ушул жерге көмгөн.
Алардын урматына Сафед-Булан мавзолейи курулган. ("сафед" араб тилинен которгондо "ыйык" дегенди түшүндүрөт).
