ОШ, 19-июл. — Sputnik. Ош шаарындагы Жапалак айыл өкмөтүндө айылда сатылган арактын баары жок кылынат.
Мындан бир нече күн мурда кайгылуу окуя болгон. Ичип алды делген 83 жаштагы абышка кемпири менен кер-мур айтыша кетип, бычак менен сайып жиберген. Анын кесепетинен 79 жаштагы байбичеси кансырап каза болгон. Ал окуядан кийин айылдагы аксакалдар, тартип коргоо жана муфтияттын өкүлдөрү чогулуп, ушундай чечимге келишкен.
"Жыйындан кийин бардык арактар жок кылынат. Кечээ анын баарын аймактагы дүкөндөрдөн сатып алып, үч Hyundai Porter автоунаасына жүктөштү. Жалпы баасы 400 миң сом болду. Жергиликтүүлөр айылда арактын сатылышына каршы чыгып жатат", — деп билдирди ал жерде жүргөн аймактык кабарчы.
"Ичип алган элем. Ачуумду токтото албай стол үстүндѳгү бычак менен кулак түпкѳ сайып жибергем. Кемпирим кыйкырган боюнча эшикке качып чыкты эле", — деп милицияга түшүндүрмѳ берген.
Учурда бул факты боюнча кылмыш иши козголуп, тергѳѳ жүрүп жатат. Кылмышка шектүү Ош шаарындагы убактылуу кармоо жайында отурат.
