"Малды карабайсың..." 83 жаштагы абышка байбичесин бычактап өлтүрдү

ОШ, 18-июл. — Sputnik. Оштун Жапалак айылында 83 жаштагы абышка нааразы болуп урушканда кызуу экендигин, кемпирин тил кайырганы үчүн бычак менен кулак түпкө сайып жибергенин милицияга айтып берди.

Кырсык тууралуу кабар Ош шаардык Ички иштер башкармалыгынын нѳѳмѳт бѳлүмүнѳ 14-июль күнү саат 18.40 чамаларында түшкѳн. Анда Ош шаарына караштуу Жапалак айылынын Аттокуров кѳчѳсүндѳ аял киши жол боюнда канга боелуп жаткандыгы айтылган. Окуя болгон жерге барган Ош шаардык ички иштер башкармалыгынын жетекчилиги, оперативдүү тергѳѳ тобу ал аялдын ким экендигин аныкташкан. Ош шаардык ИИБдин басма сөз катчысы Замир Сыдыковдун маалыматында, ал 79 жаштагы жаран болуп чыккан. Милиция кызматкерлери денесин карап чыкканда, моюнга бычак жеп каза болгондугу аныкталган.

"Кылмыштын изи сууй электе Ош шаардык ички иштер башкармалыгынын кызматкерлери шек санап маркумдун абышкасын, 83 жаштагы жаранды кармаган", — деп билдирди Сыдыков.

Абышка милициянын сурагында кырсык болгон күнү кызуу экендигин, кемпири менен кер-мур айтыша кеткендигин айтып берген.

"Ал күнү бир аз кызуу элем. Кемпирим экѳѳбүз тамактанып отуруп, айтыша кеттик. Мен ага "мал-жандын чѳп-суусун убагында карап койбойсуңбү", — деп урушсам, каяша айтты. Ачуумду токтото албай стол үстүндѳгү бычак менен кулак түпкѳ сайып жибергем. Кемпирим кыйкырган боюнча эшикке качып чыкты эле", — деп милицияга түшүндүрмѳ берген.

Тергѳѳнүн алгачкы жыйынтыктары кѳрсѳткѳндѳй, маркум канжалаган боюнча кѳчѳгѳ жардам сурап жүгүрүп чыгып, бирок, канды кѳп жоготкондугуна байланыштуу үйүнүн алдына кулап, жан берген.

"Экспертизанын кортундусунда кылмышка шектүү Ташполот Мурзаевдин канында алкоголь ичимдиги бар экендиги белгиленген", — деп билдиришти милициядан.

Учурда бул факты боюнча кылмыш иши козголуп, тергѳѳ жүрүп жатат. Кылмышка шектүү Ош шаарындагы убактылуу кармоо жайында отурат.

Милициядан абышка менен кемпирдин эки уул, төрт кызы бар экендигин айтышты.