БИШКЕК, 15-июл. — Sputnik. Борбордук шайлоо комиссиясынан Сооронбай Жээнбеков премьер-министрлик кызматын мыйзам боюнча 2017-жылдын 10-сентябрына чейин өткөрүп бериши керектигин айтышты.
БШКнын маалыматына караганда, талапкерлер документтерин тапшырган соң комиссия алардын "Президенттикке жана ЖКга болуучу шайлоолор жөнүндө" конституциялык мыйзамдын талаптарына жооп берер-бербесин текшерет. Андан соң гана каттоо чечимин кабыл алат.
Талапкерлерди көрсөтүү 1-августка чейин уланат. Алар документтерин 1-сентябрга чейин тапшырып жетишүүсү керек. Андан 10 календарлык күн өткөн соң БШК талапкерлерди каттайт да, үгүт иштери башталат.
Кыргызстандын президентин шайлоо 2017-жылдын 15-октябрында болот.
"Каттоодон өткөндөн кийин талапкерлер өздөрүнүн иши токтотууга милдеттүү. Ал эми катталганга чейин эч кандай чектөөлөр болбойт", — деп айтышты БШКдан.
Ошентип, катталгандан кийин премьер кызматын вице-премьерлердин бирине тапшырышы керек.
Эске сала кетсек, учурда БШКга президент болом деген 26 жаран документтерин тапшырган.
Партиядан көрсөтүлгөндөр: Бакыт Төрөбаев ("Өнүгүү-Прогресс"саясый партиясынан), Темир Сариев ("Ак-Шумкар" саясий партиясынан), Турсунбек Акун (Адам укугу саясий партиясынан) жана Адахан Мадумаров ("Бүтүн Кыргызстан" партиясынан).
Кыргызстандын президенти алты жылга шайланат. Ага эки ирет удаасы менен мамлекет башчы болууга укук берилбейт.
