Кыргыздар эзелтен эрдик көрсөтүп, журт башкарып келген. Атактуу Барсбек каган Эне-Сай кыргыздарынын башын бириктирип, каганат кураган. Андан соң Улуу кыргыз дөөлөтү дээрлик 100 жыл өкүм сүрүп, кыргыздар күркүрөп турган. Ушундан уламбы, айтор ар бир кыргыздын канында башкаруучулук касиети бар. Дегеним аз гана күндүн ичинде президент болом дегендердин саны 19га жетти. Жөнөкөй жарандан тартып пенсионерге чейин ажо болом деген күчтүү эл экенбиз. Керек болсо АКШлык же европалыктардын да амбициясы биздикилердикине жетпесе керек. "Ажо болуш да кеп бекен" деп хандыкка аттангандардын саны алтымыштан ашса таңгалуунун деле кереги жок. Ушундай кыйын элбиз.
Кыйындыгыбызды ушундан билиңиз, бийликти тоготпой каалаган учурда стратегиялык жолдорду жаап алабыз. Анан ачуусу келген бийлик айып салып, ага эл нааразы болуп айтышып жатып калабыз.
Башкысы эркин элбиз. Өз жерибиз бар. Канчалык чачылып, төгүлбөйлү өнүгүү жолунда бара жатабыз. Айрым алдыңкы өлкөлөр басып өткөн жолду кыска мөөнөттө өтүп, буюрса өнүгүү жолуна бет алдык. Анткени Нарын каскадына ГЭС жана чакан гидроэлектростанциялар курулганы жатат. Ошондой эле сугат жерлерге курулган үйлөр мыйзамдаштырылат. Борбор калаадагы Чүй проспектиси менен Абдрахманов көчөлөрүнүн кесилишинде өтмөк оңдолуп, өлкөгө келген туристтердин саны көбөйдү.
Өлкөбүз экономика, энергетика жана спорт жаатында гана өнүгүп тим болбостон, жарандарыбыз интернет жылдыздарына айланууда. Өткөн аптада жылдызы жангандарды бул жактан көрсөңүз болот.
Ал эми өткөн аптадагы маанилүү окуялар кызыктырса бул жактан күтөбүз.
Бүгүн тоолуу райондордо жаан жаайт.
Валюта наркы. Сомдун баасы долларга карата орто эсеп менен 69.50 (сатып алуу) жана 69.60 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү бензин 38.90 сом, АИ-95 үлгүсүндөгүсү 41.50 сом, ал эми дизель майы 36.90 сомдон сатылууда.
Соңку сөз. Иштеген тиштейт.
Амандык тилеп Исмаил Мамытов.
