БИШКЕК, 3-июл. — Sputnik. Россиядагы КР жарандары Кыргызстандын айдоочулук күбөлүгү менен иштей алышы мүмкүн. Тийиштүү кайрылуу президент Владимир Путинге жөнөтүлгөнүн РИА Новости агенттиги билдирди.
Белгилей кетсек, 1-июндан тарта Россияда чет элдик айдоочулук күбөлүгү менен транспорт айдоого тыюу салынган. Кыргызстан аталган маселе боюнча Евразиялык экономикалык комиссияга ЕАЭБдин мүчөсү катары кайрылган.
Демилгенин авторлору КРдин Конституциясында орус тили расмий тил статусуна ээ деп жазылганын баса белгилешкен.
"Бул жобо Кыргызстандын жарандарынын орус тилин жакшы билишине өбөлгө болот. Ошондой эле жол эрежесин жакшы үйрөнүүгө жеңилдик берет", — деп айтылат документте.
Ушундан улам Мамдуманын депутаттары Россиянын президентине кыргызстандыктардын өздөрүнүн улуттук үлгүдөгү айдоочулук күбөлүк менен иштөөгө уруксат берүү жагын карап көрүү боюнча кайрылуу жөнөтүштү.
